جدہ (نمائندہ خصوصی): اوورسیز کشمیری بزنس مین راجہ ریاض نے تحریک تحفظ ختم نبوت آزاد کشمیر کے مرکزی رہنماؤں حافظ محمد مقصود اور مولانا رضوان کے اعزاز میں ایک شاندار استقبالیہ اور عشائیے کا اہتمام کیا۔ یہ تقریب عقیدہ ختم نبوت کے تحفظ کے لیے اوورسیز کمیونٹی کی محبت، وابستگی اور عزم کا مظہر ثابت ہوئی۔
تقریب میں سعودی عرب کے مختلف شہروں سے تعلق رکھنے والی سیاسی، سماجی اور کاروباری شخصیات نے شرکت کی اور ختم نبوت کے تحفظ کے مشن کے لیے اپنی حمایت کا اعادہ کیا۔ تحریک کے رہنماؤں نے اپنے خطابات میں عقیدہ ختم نبوت کی اہمیت، آزاد کشمیر میں قادیانی فتنے کی سرگرمیوں اور ان کے سدباب کے لیے کی جانے والی کوششوں پر روشنی ڈالی۔ انہوں نے اوورسیز کشمیری کمیونٹی سے اپیل کی کہ وہ آزاد کشمیر کی ووٹر لسٹوں میں قادیانیوں کو مسلمانوں سے علیحدہ کرنے کے لیے اپنی آواز بلند کریں اور اس اہم جدوجہد میں اپنا کردار ادا کریں۔
تقریب میں شامل معزز مہمانوں میں انجینئر عارف مغل، سردار اشفاق خان (صدر مسلم کانفرنس)، شریف زمان راجہ، راجہ شمروز، سردار مہتاب سرور، انجینئر نعمان تصدق، قمر مشتاق، خواجہ گلزار (مکہ مکرمہ) اور میڈیا کے نمایاں افراد، بشمول عبداللہ (اردو پوائنٹ) اور حسن بٹ، نے شرکت کی اور تحریک کے مشن کے لیے مکمل حمایت کا یقین دلایا۔
میزبان راجہ ریاض نے اپنے خطاب میں تحریک تحفظ ختم نبوت آزاد کشمیر کی خدمات کو خراج تحسین پیش کیا۔ انہوں نے حافظ محمد مقصود اور مولانا رضوان کو جدہ آمد اور عمرہ کی سعادت حاصل کرنے پر مبارکباد دیتے ہوئے تحریک کے لیے ہر ممکن تعاون کی یقین دہانی کرائی۔
حافظ محمد مقصود نے میزبان اور شرکاء کا تہہ دل سے شکریہ ادا کرتے ہوئے کہا کہ اوورسیز کمیونٹی اپنے وطن کے سفیر ہیں، جو اپنی محبت اور خلوص کے ذریعے اپنے ملک سے جڑے رہتے ہیں۔ انہوں نے راجہ ریاض کی جانب سے شاندار انتظامات کو سراہتے ہوئے کہا کہ ایسے اجتماعات نہ صرف اتحاد و یکجہتی کا مظہر ہیں بلکہ ختم نبوت کے تحفظ کی جدوجہد کو تقویت دیتے ہیں۔
تقریب کے اختتام پر تحریک تحفظ ختم نبوت آزاد کشمیر کی جانب سے راجہ ریاض کو ایک خصوصی شیلڈ اور آئینی و قانونی جدوجہد پر مبنی کتاب بطور اعزاز پیش کی گئی۔ یہ پر وقار تقریب عقیدہ ختم نبوت کے تحفظ، اتحاد و اخوت اور جدوجہد کی ایک نئی امنگ کا پیغام دیتے ہوئے اختتام پذیر ہوئی
