پاکستانی پروفیشنلز کا شاندار اجتماع، یومِ آزادی پر اتحاد و یکجہتی کا اظہار
جدہ: (نورالحسن گجر کی رپورٹ)
سعودی عرب میں مقیم پاکستانی پروفیشنلز کی نمائندہ تنظیم سعودی پاکستانی پروفیشنلز کمیونٹی (SPPC) نے پاکستان کے یومِ آزادی کے موقع پر ’’روحِ آزادی‘‘ کے عنوان سے تین بڑے شہروں — ریاض، جدہ اور الخبر — میں بیک وقت تقریبات کا انعقاد کیا۔
ان تقریبات میں 450 سے زائد پاکستانی پروفیشنلز نے شرکت کی اور وطن سے محبت و کمیونٹی کے ساتھ وابستگی کا بھرپور اظہار کیا۔
مقصد و اہمیت
ایونٹس کا بنیادی مقصد سعودی عرب میں پاکستانی پروفیشنلز کے درمیان پیشہ ورانہ روابط کو فروغ دینا، روزگار کے نئے مواقع پیدا کرنا اور کمیونٹی کے اتحاد کو مزید مضبوط بنانا تھا۔
میزبانی و انتظامات
ریاض کی تقریب کی میزبانی کمیونٹی صدر حماد صدیقی اور ان کی ٹیم نے کی۔
جدہ میں کمیونٹی صدر احتشام حنیف اور رفقا سرگرم رہے۔
الخبر کی میزبانی ڈاکٹر عمیر خالد اور ان کی ٹیم نے کی۔
سفارتی نمائندگان و کاروباری شخصیات کی شرکت
تقریبات میں پاکستانی سفارت خانے اور قونصلیٹ کے نمائندگان سمیت کاروباری رہنماؤں نے خصوصی شرکت کی:
ریاض میں نجم نواز ثاقب (CWA) اور کونسلر حسیب سلطان شریک ہوئے۔
الخبر میں محترمہ جنت حسین نیکوکارہ (CWA) اور سید عزیز (CWA) موجود تھے۔
جدہ کی تقریب میں صدر انویسٹمنٹ فورم چوہدری شفقت اور ٹریڈ اینڈ ڈویلپمنٹ آفیسر فہد خان شریک ہوئے۔
سرگرمیاں اور معاہدے
’’روحِ آزادی‘‘ میٹ اپس میں نیٹ ورکنگ سیشنز، جاب سپورٹ بوتھس اور وائس آف اسٹارٹ اپس پاکستان کے ساتھ مفاہمتی یادداشت (MOU) پر دستخط شامل تھے۔ منتظمین کے مطابق یہ سرگرمیاں مستقبل میں کاروباری تعاون اور روزگار کے نئے مواقع پیدا کرنے میں اہم کردار ادا کریں گی۔
بانی کا پیغام
فورم کے بانی فیصل احمد غوری نے اپنے پیغام میں کہا:
"پاکستانی، پاکستانی کا ساتھ دیں، یہی SPPC کا پیغام ہے۔”
انہوں نے مزید وضاحت کی کہ SPPC ایک غیر منافع بخش اور رضاکارانہ تنظیم ہے جو سعودی عرب میں مقیم چار ہزار سے زائد پاکستانی پروفیشنلز کو ایک ایسا پلیٹ فارم فراہم کرتی ہے جہاں وہ پیشہ ورانہ ترقی، باہمی تعاون اور سماجی بھلائی کے لیے سرگرم عمل ہیں۔
اتحاد و وابستگی کی مثال
یہ تقریبات سعودی عرب میں پاکستانی کمیونٹی کے عزم، اتحاد اور ترقی کے سفر کی روشن مثال قرار پائیں اور یومِ آزادی کے موقع پر وطن کے ساتھ جڑے رہنے کا عہد تازہ کیا گیا۔
