اسلام آباد: تحریک انصاف کے بانی عمران خان کی رہائی سے متعلق ان کی بہن علیمہ خان کے حالیہ دعوے کو بیرسٹر گوہر نے سختی سے مسترد کر دیا۔
جیو نیوز سے گفتگو میں بیرسٹر گوہر نے واضح کیا کہ 24 نومبر یا اس سے پہلے ان کا حکومت سے کوئی رابطہ نہیں ہوا۔ انہوں نے کہا کہ حکومت سے بانی تحریک انصاف سے ملاقات یا رہائی کے حوالے سے کوئی بات نہیں ہوئی۔
جب ان سے علیمہ خان کے بیان کے بارے میں سوال کیا گیا کہ انہوں نے عمران خان کی 20 دن میں رہائی کا ذکر کیا تھا، تو بیرسٹر گوہر نے اس دعوے کو جھوٹا قرار دیتے ہوئے کہا، "میں نے رہائی کے بارے میں کبھی کوئی بات نہیں کی اور نہ ہی حکومت نے ایسا کوئی وعدہ کیا ہے۔”
انہوں نے یہ بھی کہا کہ دھرنا ختم کرنے کے بدلے عمران خان کی رہائی کا دعویٰ حقیقت کے برعکس ہے۔
واضح رہے کہ علیمہ خان نے لاہور میں میڈیا سے بات کرتے ہوئے کہا تھا کہ حکومت دباؤ میں آ گئی تھی اور بیرسٹر گوہر کو جیل میں عمران خان سے ملاقات کے لیے بھیجا گیا، جہاں انہیں 20 دن میں رہائی کا وعدہ کیا گیا تھا۔
