معاہدے کے متن کے مطابق تجارتی اور دوطرفہ تعاون کے معاہدوں پر کام کرنا شامل ہے جن میں وفاقی جمہوریہ صومالیہ کی خود مختاری کے تحت ایتھوپیا کو سمندر تک رسائی کی ضمانت دی جائے گی۔
ترک صدر رجب طیب ایردوان نے اعلان کیا ہے کہ افریقی ممالک صومالیہ اور ایتھوپیا بدھ کے روز انقرہ میں ان کی ثالثی میں ہونے والے مذاکرات کے اختتام پرایک معاہدے پر پہنچ گئے ہیں۔ یہ معاہدہ ایک "تاریخی” قدم ہوگا جو قرن افریقہ کے دونوں پڑوسی ممالک کے درمیان کشیدگی کو ختم کرے گا۔
انقرہ میں صومالی صدر حسن شیخ محومد اور ایتھوپیا کے وزیر اعظم ابی احمد کے ساتھ مشترکہ پریس کانفرنس کے دوران ایردوآن نے کہا کہ انہیں امید ہے کہ یہ تاریخی معاہدہ موغادیشو اور ادیس ابابا کے درمیان امن اور تعاون پر مبنی ایک نئی شروعات کی طرف پہلا قدم ہو گا۔
ترکیہ کی طرف سے شائع کردہ معاہدے کے متن کے مطابق دونوں فریقوں نے "اختلافات اور متنازعہ مسائل کو ترک کرنے اور مشترکہ خوشحالی کی طرف تعاون کو مضبوطی سے آگے بڑھانے پر اتفاق کیا”۔
متن کے مطابق دونوں ممالک نے تجارتی اور دوطرفہ معاہدوں کی منظوری کے لیے کام کرنے پر بھی اتفاق کیا جو ایتھوپیا کو "وفاقی جمہوریہ صومالیہ کی خود مختار اتھارٹی کے تحت سمندر تک قابل اعتماد، محفوظ اور پائیدار رسائی” کی ضمانت دے گا۔
اس مقصد کے لیے دونوں ممالک فروری کے اختتام سے پہلے تکنیکی بات چیت کا آغاز کریں گے جو زیادہ سے زیادہ چار ماہ تک جاری رہے گی
۔ اس کا مقصد دونوں ممالک کے درمیان اختلافات کو "بات چیت کے ذریعے دور کرنا ہے۔ اس حوالے سے جہاں انہیں ضرورت پڑی تو ترکیہ ان کی مدد کرے گا
