سعودی وزارت خارجہ کا پانچواں اجلاس: خارجہ پالیسی کی ترجیحات اور 2030 وژن پر تبادلہ خیال
سعودی وزارت خارجہ نے اتوار کے روز ریاض میں مملکت کے سفارتی مشنز کے سربراہان کا پانچواں اجلاس منعقد کیا، جس میں سعودی وزیر خارجہ شہزادہ فیصل بن فرحان اور دیگر وزارت کے عہدیداروں نے شرکت کی۔ اجلاس کی سرپرستی سعودی فرمانروا شاہ سلمان بن عبدالعزیز نے کی۔
اس اجلاس میں سعودی عرب کی خارجہ پالیسی کی ترجیحات، سٹریٹجک مقاصد اور وژن 2030 کے اہداف کے حصول میں سعودی سفارتی مشنوں کا اہم کردار اجاگر کیا گیا۔ اجلاس میں وزیر حج وعمرہ ڈاکٹر توفیق الربیعہ، وزیر سیاحت احمد الخطیب، وزیر سرمایہ کاری خالد الفالح، وزیر اقتصادیات فیصل الابراہیم اور دیگر اہم عہدیداروں نے شرکت کی۔
اجلاس میں سعودی مشنوں کی کارکردگی کو بہتر بنانے کے لیے انتظامی، مالیاتی اور ڈیجیٹل اقدامات پر بھی بات کی گئی، تاکہ ان کی آپریشنل کارکردگی میں مزید بہتری لائی جا سکے۔
سعودی عرب کے بیرون ملک مشنوں کے سربراہان کا پہلا جنرل اجلاس 2006 میں ریاض میں منعقد ہوا تھا جس کا مقصد سفارتی کارکردگی کو بڑھانا تھا۔ اس کے بعد 2010 میں دوسرا اجلاس ہوا جس میں وزارت خارجہ کے پانچ سالہ سٹریٹجک منصوبے اور مشنز کے کردار پر تبادلہ خیال کیا گیا۔ 2017 میں تیسرے اجلاس میں کام کی حکمت عملی اور پروفیشنل کارکردگی کے معیارات پر توجہ دی گئی۔ چوتھا اجلاس ‘سفیر کا پیغام’ کے عنوان سے منعقد کیا گیا تھا۔
