جدہ ۔(نورالحسن گجر سے )
سماجی رابطہ کمیٹی کے زیرِ اہتمام ایک اہم فکری و سماجی نشست منعقد ہوئی جس کے مہمانِ خصوصی اسلامی تعاون تنظیم (او آئی سی) میں اسسٹنٹ سیکریٹری جنرل برائے سائنس و ٹیکنالوجی، جناب آفتاب احمد کھوکھر تھے۔
اس پُروقار تقریب کی میزبانی سماجی رابطہ کمیٹی کے صدر جناب راجہ محمد ریاض نے کی، جنہوں نے تمام معزز مہمانانِ گرامی کا پرتپاک خیرمقدم کیا اور کمیٹی کے مقاصد، خدمات اور سرگرمیوں پر روشنی ڈالی۔
پروگرام میں مختلف علمی و سماجی شخصیات نے شرکت کی، جن میں پروفیسر ڈاکٹر محمد معین الدین، جناب آصف بٹ، انجینئر افضل غازی، جناب نعمان تصدق، جناب ماجد، جناب عامر، جناب عثمان اور جناب نورالحسن گجر شامل تھے۔
نشست کے دوران شرکاء نے دنیا کے بدلتے ہوئے سیاسی و سماجی حالات، عالمی منظرنامے کی تبدیلیوں اور معاشرتی سطح پر ابھرتے نئے رجحانات پر اپنے بصیرت افروز خیالات کا اظہار کیا۔ تمام مقررین نے نہایت سنجیدگی اور وقار کے ساتھ اپنے نقطۂ نظر پیش کیے، جس سے محفل علم و فکر کا حسین امتزاج بن گئی۔
اختتامی خطاب میں مہمانِ خصوصی جناب آفتاب احمد کھوکھر نے بین الاقوامی تعلقات، سائنس و ٹیکنالوجی کے میدان میں تعاون، اور عالمِ اسلام کو درپیش موجودہ چیلنجز پر جامع اور فکرانگیز خیالات پیش کیے۔
یہ نشست سماجی رابطہ کمیٹی کی علمی و فکری سرگرمیوں میں ایک نمایاں سنگِ میل کی حیثیت رکھتی ہے۔
