انقرہ: ترکیہ کے صدر طیب ایردوان نے اعلان کیا ہے کہ دہشت گرد گروپوں داعش اور کرد تنظیموں کا جلد صفایا کر دیا جائے گا۔ ان کے مطابق، یہ گروہ شام کی بقا کے لیے سنگین خطرہ ہیں اور انہیں ختم کرنا وقت کی اہم ضرورت ہے۔
ایردوان نے ان خیالات کا اظہار جمعہ کے روز قاہرہ میں ایک کانفرنس میں شرکت کے بعد وطن واپسی پر کیا۔ انہوں نے واضح کیا کہ دہشت گرد تنظیموں ‘پی کے کے’ اور ان کے ذیلی گروپوں، جن میں ‘سیرین ڈیموکریٹک فورسز’ (ایس ڈی ایف) شامل ہیں، کے خلاف ترکیہ کا موقف واضح ہے۔
ایردوان نے کہا:
"یہ وقت ہے کہ شام سے دہشت گرد تنظیموں کا مکمل خاتمہ کیا جائے۔ ‘ایس ڈی ایف’ دراصل ‘پی کے کے’ کے غلبے میں ہے، جو دہائیوں سے ترک سرزمین پر جنگجوئی کے مرتکب ہیں۔”
ترکیہ نے ان تنظیموں کو خطے کے امن اور شام کی سالمیت کے لیے خطرہ قرار دیتے ہوئے مؤقف اپنایا ہے کہ ان کا جلد از جلد خاتمہ ضروری ہے۔
یہ بیان ترکیہ کے سخت گیر موقف اور خطے میں دہشت گردی کے خلاف ترکیہ کی جاری کارروائیوں کے عزم کی عکاسی کرتا ہے۔
